NATIONAL News — Pwede nga ma-conclude nga “policy” it drug war it administrasyon ni former president Rodrigo Duterte ro Extrajudicial killings (EJKs).
Raya ro ginpahayag ni House Quad Committee chairperson Robert Ace Barbers.
Suno kay Barbers, nga kon pagabasehan ro mga ginbuhian nga mga pahayag ni Duterte sa Senate hearing angot man sa drug war, mahambae nga nangin polisiya eon ro pagpamatay nga owa it due process bangud nga raya man ro nangin mandu it dating presidente.
Samtang, ginpahayag man ni former presidential chief legal counsel Salvador Panelo nga kon may una gid man nga extrajudicial killings sa administrasyon ni Duterte, raya hay bukon it “state-sponsored.”
Suno pa kana nga owa man gin-ako ni Duterte ro pagkomiter it krimen ukon sa pagtukod it Davao Death Squad.
Madumduman nga sa Senate Blue Ribbon subcommittee hearing, ginpahayag ni Duterte nga may una imaw nga death squad nga ginaeakipan it mga “gangsters.”
Ginhambae man it former president nga gina-aku nana ro bilog nga legal nga responsibilidad sa drug war it anang administrasyon apang indi imaw magpangayo it pasaylo kara.
Suno kay Duterte, nga ro drug war hay bukon it angot sa pagpatay it mga tawo kundi agud nga protektahan ro mga inosente ag indi makasukoe nga mga pumueuyo.
Nasayuran nga maabu ro nagabatikos sa maduguon nga drug war ni Duterte bangud nga maabu man nga mga drug suspects ro gina-alegar nga ginpamatay it mga pulis ag owa eon ginpaagi sa due process.
May mga inosente man nga mga tawo nga ginasugid nga nadaeahig eamang sa EJK it drug war.
Base sa record it Philippine National Police, nag-abot sa 6, 000 nga ka tawo ro nagkaeamatay sa war on drugs ni Duterte.
Apang ginkontra it human rights groups ro nasambit nga datos ag ginapahayag nga indi magnaba sa 30,000 ro mga nagkaeamatay eakip eon ro mga vigilante killings.
