Padayon nga ginapangatubang it mga teachers ro pagbag-o sa sistema it edukasyon ag ro mga hangkat sa pagturo sa makabag-ong henerasyon, partikular sa paggamit it teknolohiya ag pag-intindi sa nagkaeain-eain nga kinahangeanon it mga estudyatnte.
Suno kay Niño Lachica Estrada, special science teacher 1 sa Aguinaldo T. Repiedad Senior Integrated School, indi maduea ro mga hangkat sa pagturo apang bukon raya it hadlang para padayunon ro anang propesyon.
Sa pihak it kagustuhan nana kato nga maging doktor, naadto si Estrada sa pagturo ag uwa nagbuhay hay ginpalangga eon nana ro nasmabit nga propesyon.
Naging inspirasyon nana ro anang mga dating teacher pati eon man ro mga myembro it andang pamilya nga una sa patag it edukasyon.
Paathag nana, kaibahan sa mga hangkat nga ginapangatubang it mga teacher makaron ro pag-salig it mga estudyante sa teknolohiya. Apang, possible man sigon gihapon raya nga gamiton bilang kasangkapan agud mapamayad ro proseso it pagturo ag pagkatuto.
Importante man suno kana ro pagiging maintindihon apang matatag it teachers ag ro pag-tao it tamang giya sa mga estudyante, kapin eon sa mga may ginadaea nga problema.
Ginpamilit man nana ro mas maeawig nga papel it mga teachers sa kabuhi it kabataan. Bukon eamang sigon it pagturo it mga lessons ro andang obligasyon kundi ro paghubog sa mga estudyante agud matuman ro andang mga natun-an.
Ro pinakamabahoe sigon nga premyo para sa mga teachers hay ro makita ro andang mga estudyanteng padayon nga naga-umwad ag nagiging madinaeag-on sa andang mga napiling propesyon.
