Sangka electrician sa India ro nabisto nga ginapatay kara kada gabi-i ro kuryente sa andang banwa para makipagkita sa sekreto nga karelasyon.
Sangka misteryo para sa mga residente it Ganeshpur ro sunud-sunod nga gabi-i nga pagkaduea it kuryente sa andang maisot nga banwa.
Suno sa power supply company, owa it power grid malfunction nga napabalita sa andang lugar.
Mag-eowas kara, mas pa sandang nagduda nga may nagasabotahe sa andang kuryente bangud nga ro mga kaiping nga banwa nanda hay owa man nakakaexperiensiya it brownout.
Nataeupangdan it mga residente nga nagakatabu ro brownout pilang minuto pag-tunod it adlaw ag nagabuhay it daywa hasta tatlong oras.
Naisip nanda nga may foulplay ag kinahangean eon nanda raya nga imbestigahan.
Sekreto nga nagbilog ro mga residente it grupo nga magaronda sa bilog nga banwa agud nga mag-imbestiga.
Sang gabi-i sa andang pagronda, nadakpan nanda ro sangka babaye ag eaeaki nga nagapanago sa sangka eskuwelahan.
Nasayuran nga ro eaeaki hay sangka electrician.
Nag aku ro electrician nga imaw ro nagapatay it kuryente para makipagkita sa anang girlfriend.
Gina obra nana raya bangud nga nagabaeabag ro andang mga pamilya sa andang relasyon.
Ginbugbog ro electrician ag ginparada sa bilog nga banwa agud nga ipahisayod sa tanan nga imaw ro suspek sa pilang domingo nga brownout.
Matapos nga mabulgar ro kalokohan it electrician, naangkon nana ro happy ending bangud nga pilit sandang ginpaksae it anang sekretong nobya sa bulig it mga konserbatibong village elders ag village council members.
