Health News ——-Bukas ro Food and Drug Administration (FDA) engkasong magpa-rehistro para sa emergency use kara sa Pilipinas ro sangka COVID-19 vaccine it China nga nakataeana sigon nga aprubahan it Chinese FDA.
Suno kay FDA director general Eric Domingo, pagaabuton it 45 hasta it 60-diyas ro proseso it andang evaluation antes makapaguwa it desisyon kon pagapasugtang magamit para sa mga emergency nga kaso ro ginasugid nga bakuna.
Mahimo eamang sigon nga mapadasig ro proseso it aplikasyon kon ro nasambitang bakuna hay nagpakita it maayos nga datos, ginkilaea it World Health Organization (WHO), ag rehistrado it andang local regulatory agency.
Ko kan-o eamang kat ginhambae ni Philippine Ambassador to China Chito Sto. Romana nga maeapit eon lang aprubahan ro Chinese FDA it bakuna kontra sa COVID-19.
Owa it ginpangaeanang bakuna ro opisyal, apang ko Agosto madumdumang gintaw-an it approval for emergency use it foreign FDA ro “CoronaVac” vaccine it kompanyang Sinovac para magamit sa China.
Ro bakuna it nasambitang biopharmaceutical company ro nagapanguna sa mga aplikasyon nga makaangkon it clinical trial sa nasyon.
Sa ulihing report maghalin sa Department of Health, nakaeosot eon sa Vaccine Expert Panel ro clinical trial application it Sinovac.
Kinahang-ean pa nandang maangkon it approval halin sa Research Ethics Board ag FDA antes raya matistingan sa mga Pilipinong pasyente.
