KALIBO, Aklan—Nagakasubo makaron ro bilog nga pamilya Ambay it Brgy. Nauring, Pandan, Antique kasunod sa pagpatay kay Bonna Hercia Ambay, 24-anyos, sangka branch manager it pawnshop sa may Mabini St. Kalibo, Aklan.
Ginpahayag ni Police Major Jason Belciña, hepe it Kalibo Municipal Police Station nga sandig sa andang pinakaulihi nga imbestigasyon, natumod ro suspek ag responsable sa krimen nga si Mark Archie Torrefiel, 31-anyos it Brgy. Cajilo, Makato ag mismong reliever nga gwardya it establisyimento.
Narekober sa area it krimen ro sangka kutsilyo nga posibleng ginamit sa pagpatay sa daeaga kon siin nakitaan raya it lastro sa nagkaeain-eain nga parte it anang eawas partikular sa dughan, liog, butkon ag alima.
Mag-eowas kara, nakit-an man ro ibang kagamitan it biktima ag maging it ana it suspek nga may mga mantsa it dugo.
Samtang, sa puno it kasagingan sa mismong panimaeay nanda sa Makato nakit-an ro service firearms nga ana it security agency nga anang ginatrabahuan.
Sa follow up investigation it mga otoridad, nasayuran ko ulihi nga nakasakay it barko sa Brgy. Caticlan, Malay ro suspek kaibahan ro anang live-in partner nga si Cristina Oraba patabok sa Metro Manila.
Sa pihak kara, nagapangatubang man sa nagkaeain-eain nga kaso ro suspek partikular kaso it pagpanakaw.
Samtang, ginduea eon it pulisya ro anggulo nga pagpanakaw matapos nga ginkumpirma ni Ms. Leamil D. Malungayon, area manager it kompanya nga uwa it naduea nga alahas ag kwarta sa establisyimento.
