KALIBO, Aklan—Owa man naapektuhan ro regular nga operasyon it Metro Kalibo Water District (MKWD) kasunod it pag positibo sa COVID-19 it sambilog sa andang empleyado nga eaeaki ko nagtaliwan nga domingo.
Suno kay Engr. Lydio Ureta, General Manager it MKWD nga nagpatigayon eamang sanda it maid-id nga disinfection sa bilog nga opisina agud nga maprotektahan ro mga personnel ag ro mga kliyente nga nakikipag-transaction.
Gindugang pa ni Engr. Ureta nga sa andang baeay nabo-oe it empleyado ro virus ag owa man raya masyadong nagatinir sa opisina bangud nga naka deploy raya sa field.
Ginasugid nga ro empleyado nga sangka inspector hay close contact it anang misis nga nakaangkon it deadly virus.
Matapos nga ipaidaeum sa swab test, natukiban nga nagpositibo man raya sa sakit rason nga insigida imaw nga gin-quarantine ag nagpatigayon it contact tracing ro municipal health office it banwa it New Washington.
An-um sa andang empleyado nga may mabuhay nga exposure sa pasyente ro ginmanduan nga mag-home quarantine ag ro daywa hay gin-swab test nga sa mayad nga swerte hay puro man nag negatibo sa coronavirus.
Ginatapos eon lang sigon it mga raya ro andang self-quarantine nga puro asymptomatic bilang precautionary measure agud nga ma-control ro pagkalhit it virus.
Samtang, ginpahayag pa ni Engr. Ureta nga hugut nga ginapatuman sa andang opisina ro minimum health and safety protocols, partikular ro pagsuksok it face mask ag face shield, pagsueat it mga importanteng impormasyon sa logbook ag ro pag disinfect it alima.
