Kalibo Aklan ——-Ginklaru ni Department of Labor and Employment ukon DOLE-Aklan Provincial Director Carmela Abelar nga bawae ro mga matag-od ag pauman-uman nga kontrata sa pagbo-oe it mga empleyado kapareho it ginatawag nga “endo” ukon end of contract agreement.
Suno kay Abelar nga raya hay sandig sa Department Order 174, Series of 2017.
Ginhalimbawa kara ro kontrata nga owa ginapaabot it an-um nga buean ro serbisyo it empleyado agud nga indi raya maging regular sa trabaho.
Gindugang pa ni Abelar nga hugut nanda nga ginapatuman ro nasambit nga mandu ag tanan nga mga laye ag patakaran agud nga protektahan ro kinamatarung it mga trabahador.
Gina-require sigon nanda ro mga employer nga may mga empleyado nga naga-trabaho eon sa kompaniya it an-um nga buean ag sang adlaw nga mag-isyu it regular appointment paper agud nga ma-enjoy man nanda ro mga benepisyo it sangka regular nga empleyado.
Ginpahayag dugang nga engkaso nga i-terminate ro empleyado sa sueod it limang buean nga probationary period kara hay dapat nga may supporting papers it evaluation it mga rason nga indi imaw dapat nga ma-regular sa trabaho.
Pwede sigon nga ireklamo sa DOLE kon ginpapundo sa pagtrabaho nga owa it nagakaigo nga rason.
