KALIBO, Aklan — Gin-aresto it mga katapo it Kalibo Police Station ro sangka 20-anyos nga engineering student matapos sigon nga paeagon ro 19-anyos nga karelasyon nga igapakalhit ro mga maselan nanda nga litrato.
Nadakpan ro suspek matapos nga magkasa it entrapment operation ro pulisya sa sangka lodging house sa banwa it Kalibo kasunod it reklamo it owa ginpangaeanan nga biktima.
Suno sa complainant nga ginpaeag imaw it suspek nga gintago sa alyas nga “John” nga igapaguwa ro andang mga maselan nga litrato kun indi imaw makikipaghieawas sa suspek.
Ginkumpiska it mga otoridad ro cellphone it suspek para sa nagakaigo nga imbestigasyon.
Depensa it suspek nga pareho nanda nga ginkasugtan it nobya nga magakita sa nasambit nga lodging house.
Dugang pa kara nga haeos tatlong dag-on eon ro andang relasyon, apang gintago raya sa mga ginikanan it babaye.
Gusto sigon it mga ginikanan it karelasyon nga magtapos anay raya sa kolehiyo sa kursong education.
