KALIBO, Aklan—Engkaso nga pagataw-an it kahigayunan, mabahoe ro posibilidad nga pagabatunon ni 1st district sangguniang panlalawigan member Nemesio Neron ro pwesto nga general manager it Aklan Electric Cooperative ukon Akelco.
Apang suno kana nga hasta sa makaron hay owa pa it may naka abot nga offer kana.
Aminado si Neron nga magkahalong kalipay ag pagkangawa ro anang nabatyagan kat mabatian ro nasambit nga balita.
Nalipay sigon imaw bangud nga raya hay nagapakita nga may trust and confidence kana ro gobyerno partikular ro national electrification administration ukon NEA kun sa siin under kara ro Akelco.
Nasayuran nga si Neron hay dating naging board of directors it district 9 ag ko ulihi hay naging presidente it board of directors.
Madumduman nga ko Mayo 3, 2021 hay nagretiro eon si dating general manager Engr. Alexis Regalado sang domingo matapos raya nga mag-leave of absence nga ginkakibot it mga empleyado ag opisyal it Akelco.
Apang nauna eon nga ginpahayag ni Akelco board secretary Atty. Ariel Gepty nga ro pagretiro ni Regalado hay ginpaiway anay hasta nga indi raya makasumite it anang sabat sa internal auditor report.
