KALIBO, Aklan–Ginpasiguro it National Task Force to End Local Communist Armed Conflict nga uwa it direktang epekto sa industriya it turismo sa isla it Boracay ro engkwentro sa tunga it 12th Infantry Batallion Philippine Army ag mga miyembro it Communist Party of the Philippine-New People’s Army (CPP-NPA) sa idaeom it SDG Igabon Platoon it Central Negros Front it Kilusang Rehiyon Panay sa Sitio Itabag, Barangay Manika, Libacao, Aklan.
Apang, ginpahayag ni NTF-ELCAC spokesperson for Legal Affairs Atty. Flosemer Chris Gonzales nga inde dapat pagtaw-an it kahigayunan ag lugar nga mapanaguan ro mga rebeldeng grupo eabi eon sa probinsya it Aklan nga pilang dag-on eon gindeklarang insurgency free.
Inde sigon nanda pagpasugtan nga gamiton it grupo ro mga kabukiran sa Aklan nga maging safe areas it mga raya agud nga makapabaskog ag magtuga it kinagamo.
Madumdumang nga nagbuhay it haeos 25 minutos ro baeayluhan it eopok antes nga nag-atras paeayo ro mga rebelde nga ginatantyang kapin sa 20 indibidwal.
Uwa it naninahan sa tropa it militar apang may nakit-an sandang mga mantsa it dugo nga posibleng halin sa mga ninahang rebelde nga tinamaan sa andang pagbaeayluhan it mga eopok.
Narekober sa area ro daywang armalite rifles, mga bala, magazine, cellphone, notebooks, nagkaeain-eain nga dokumento ag apat nga bandera it NPA
