KALIBO, Aklan—Masyadong dukot ro engkwentruhanay sa tunga ni US President Donald Trump ag Democratic nominee Joe Biden sa estado it Ohio.
Suno kay bombo international correspondent Merilyn Elumir-Sweet nga neck to neck ro andang away makaron pilang adlaw antes ro eleksyon sa Nobyembre 3.
Gindugang pa kara nga ro resulta it eleksyon sa Ohio hay pirmeng ginabantayan bangud nga kon sin-o ro nagadaog idtu hay raya ro kaeabanan nga ginadeklara nga winner sa pagkapangueo.
Ginhalimbawa nana nga ko 2016, si Trump ro nagdaog sa nasambit nga estado, apang makaron nga dag-on hay may mga senyales nga ro mga botante hay nagabaliskad pabor kay Biden.
Ginpahayag pa ni Merilyn nga maabu nga mga botante ro nagboto makaron sa pihak it padayun nga paeag it Coronavirus Disease ukon COVID-19 pandemic.
Apang bukon it kapareho ko nagtaliwan nga mga eleksyon hay naging maeaka ro pagpatigayon makaron it kampanya bangud sa ginapatuman nga social distancing.
Agresibo sigon it Trump sa anang kampanya bangud sa paghingabot nga mabo-oe ro 18 nga electoral votes it electoral college sa Ohio.
Kumpiyansa man suno kana ro mga tagasuporta ni Trump nga imaw gihapon ro magadaog maskin nga masyadong close fight sanda ni Biden.
Maabu sigon nga mga working-class voters ro nag-ayaw eon kay Trump bangud sa mga promisa kara nga owa natuman, nagahinoesoe it pagsuporta kana ag ro paglikaw sa mga balita sa politika.
