KALIBO, Aklan — Haum nga uman nga magbalik bilang alkalde it banwa it Kalibo si Engr. Emerson Lachica sa maabot nga 2025 midterm elections.
Apang ro pinal nga desisyon suno kana hay nakadepende sa anang partido nga ginasaniban makaron , ro Tibyog-Akean .
Suno kana nga bangud nga affiliated eon imaw sa Tibyog hay pagasuportahan ag pagarespetuhon nana kon anuman ro andang maging desisyon.
Maskin suno kana nga naputos it mga hangkat ro anang pagpungko bilang mayor bangud sa pagtama it Covid 19 pandemic, pagkasunog it Kalibo Public Market ag pagtama it mabaskog nga bagyong Odette, apang madinaeag-on nana nga naeampasan raya tanan.
Bangud nga first term eang ro anang natapos, maabu pa ro anang mga manami nga handum para sa banwa it Kalibo partikular ro pagduso kara nga maging sangka siyudad .
Ginpasiguro man sigon kana it anang mga kaalyadong barangay captains nga kapareho nana hay nag-ober-da-bakod man sa Tibyog nga igatau kana ro andang kompletong suporta sa maabot nga eleksyon.
