KALIBO, Aklan–Nagpasaeamat si Outgoing CAAP-Aklan manager Engr. Eusebio Monserate Jr. sa tanan nga stakeholders ag empleyado nga nagtao kana it mainit nga suporta ag kooperasyon sa sueod it haeos ap-at nga dag-on nana nga pagdumaea sa paeuparan.
Suno kay Engr. Monserate, naging mabahoe nga hangkat sa anang pagdumaea ro pagpanaeasa it COVID-19 pandemic ag ro maisot nga sukat it paeuparan.
Sa sueod sigon it pilang dag-on nana nga pagserbisyo sa KIA, maabu nga mga pagbag-o ro anang nahimo eabi eon sa bahin it imprastraktura.
Ginakaeakipan raya it rehabilitasyon it terminal building, expansion it runway, pagrepair sa mga samad sa parking base ag pag-clearing ukon mintina it obstruction sa paeuparan.
Si Engr. Monserate hay igabutang bilang acting Area VII manager it Civil Aviation Authority of the Philippines (CAAP).
Ro mga paeuparan sa idaeom it CAAP Area VII hay ro Mactan-Cebu International Airport, Bohol-Panglao International Airport, Dumaguete Airport, Siquijor Airport ag Ubay Airport.
Ro reassignment ni Engr. Monserate hay magiging epektibo umpisa Hulyo1.
Samtang, ro magabaylo kana hay si Roxas City airport manager Engr. John William Fuerte.
