Kalibo Aklan ——–Pagatun-an pa it Aklan Provincial Task Force on 2019 Novel Coronavirus ro posibilidad nga pagbawi ukon pagpaeawig pa sa ginapatuman nga Enhanced Community Quarantine sa probinsiya nga magatapos eon kunta sa maabot nga abril 14.
Suno kay Aklan Governor Florencio Miraflores nga raya hay nakadepende sa sitwasyon it probinsiya, kun sa siin, padayun pa ro pagtaas it kaso matapos nga nagsaka eon raya makaron sa an-um .
Engkaso nga makaangkon it extension, tuyo sigon kara nga mas pang mapabaskog ro mga tikang agud nga maprotektahan ro ikamayad nga eawas it mga residente kontra sa pandemic.
Sa makaron hay preparado suno kana ro Aklan Provincial Hospital sa pagtatap sa mga pasyenteng may COVID-19.
Amat-amat eon man sigon nga nag-aeabutan ro andang ginbakae nga mga Personal Protective Equipment (PPE) halin sa China ag iba pang mga donors .
Nag-abot eon man suno kana ro mga ventilators, video laryngoscopes ag iba pang kagamitan.
Samtang, nagpasaeamat man si Governor Miraflores bangud nga owa it anuman nga Health Workers ag iba pang frontliners ro nakaangkon it COVID Infection.
Nasarangan sigon nanda nga boengon ro mga nagpositibo sa COVID sa Aklan.
Sa makaron suno kana hay nagpahayag eon ro Western Visayas Medical Center sa siyudad it Iloilo nga indi magabaton it pasyenteng may COVID-19 halin sa mga kaiping nga probinsiya .
Angot kara, gin-engganyo nana ro mga pumueuyu nga padayun nga sundon ro stay at home order, pirmang maging malimpyo sa eawas , curfew, social distancing ag iba pa.
