KALIBO, Aklan — Ginpaeawig pa ro ginapatuman nga enhanced community quarantine (ECQ) sa bilog nga probinsya it Aklan nga magatapos kunta sa Abril 14.
Raya ro ginkumpirma ni Kalibo Mayor Emerson Lachica sa Bombo Radyo Kalibo.
Raya hay kasunod it ginhimo nga konsultasyon sa 17 alkalde pinaagi it teleconference agud mapunggan ro pagkalhit it coronavirus disease.
Sa Lunes hay ginaeaumang maipaguwa ro Executive Order ni Governor Florencio Miraflores, chairman it Aklan Inter-Agency Task Force on COVID-19 kaangot sa pagpaeawig it ECQ hasta sa Abril 30, 2020, alas-11:59 it gabi-e.
Sa pagahimuong extension, magapadayon sa gihapon ro mga presenteng guidelines it IATF.
Una kara, ginrekomenda it kaabuan it miyembro it task force ro pagpaeawig it ECQ agud nga inde eon madugangan ro kaso it COVID-19 sa probinsya.
Sa nakataliwan nga limang adlaw, nagapabilin sa an-om ro kumpirmadong kaso it makamaeatay nga virus sa Aklan, kon sa siin, una eon sa estable nga kondisyon.
Sa makaron, ginahueat pa ro resulta it specimen sample it 36 ka mga indibidwal sa Aklan nga ginpadaea sa Western Visayas Medical Center sa Iloilo City.
