Kalibo Aklan ———Bantay sarado makaron it kapulisan ag mga tawuhan it Barangay ro tanan nga mga entry ag exit points it Purok 12, Oyo Torong St. Kalibo matapos nga ginpaidaeum raya sa granular lockdown umpisa ko miyerkules it aga-aga.
Suno kay P/Lt. Col. Belshazzar Villanoche, hepe it Kalibo Municipal Police Station nga hugut nanda nga ginapatuman ro nakabaehag sa Executive Order nga ginpaguwa ni Kalibo Mayor Emerson Lachica agud nga masaea it husto ro mga nagasueod ag guwa sa nasambit nga lugar .
Nauna eon nga ginpaidaeum sa granular lockdown ro lugar matapos nga matumod nga may mataas nga nailistang kaso it COVID-19.
Naga-abot sa masobra sa 100 nga kabaeayan ro apektado it nasambit nga lockdown ag maskin ro operasyon it mga grocery stores ag iba pang establisimento sa lugar hay ginbawaean anay nga magbukas.
Apang may pila sigon nga mga sari-sari store ro bukas nga pwedeng mabak-ean it kinahangeanon it mga residente.
Gindugang pa ni Villanoche nga hugut nga ginabawaean ro mga residente nga magguwa it baeay mag-eowas eon lang kon emergency ag magasueod sa trabaho .
Owa man ginapasugtan nga magsueod-guwa ro mga bukon it otorisadong saeakyan ag tempranong ginapatuman ro curfew ag liquior ban.
Haeos siyam nga adlaw nga magabuhay ro granular lockdown ukon hasta sa Hulyo 29.
