KALIBO, Aklan—Sa pihak nga preparado eon ro pagbalik it mga international airline companies sa Kalibo international airport, apang nagapabilin nga sab-eag sa pagsueod it mga international tourist partikular ro halin sa South Korea ag China hay ro ginpatuman nga entry requirements halin sa andang point of origin.
Raya ro ginpaathag ni Engr. Eusebio Monserate, Jr., Manager it Civil Aviation Authority of the Philippines ukon CAAP-Aklan rason nga owa pa masyadong nataeupangdan ro presensiya it mga foreign tourist sa nasambit nga paeuparan nga paagto sa Isla it Boracay.
Nagaduha-duha suno kana ro mga turista bangud nga masyadong magastos ro magbakasyon makaron nga tiempo tuga it mga quarantine regulations ag iba pang requirements nga sanda ro magasabat.
Nasayuran nga antes ro pagtama it pandemya, ro south korea ag china ro nagapangunang foreign tourist market sa Boracay rason nga haeos 6 hasta 8 nga siyudad sa China kaibahan ro wuhan ro may direct flights ag maabu nga iba pang siyudad sa Korea.
Naga-averge suno kana it 30 nga mga international flights ro gina-cater it Kalibo airport antes ro pandemya.
Samtang, nabatyagan eon pagbuhos it mga pasahero sa paeuparan kun sa siin nakalista sanda it pitong domestic flights kada adlaw.
