KALIBO, Aklan — Plano makaron it LGU-Malay nga sertipikahang “urgent” ro proposisyong pagpataas it environmental fee sa mga turistang nagasueod sa isla it Boracay.
Raya hay makataliwang pumabor ro LGU-Malay sa suhestyon ni DENR Secretary Roy Cimatu nga pataasan ro “environmental fee” nga ginasukot sa mga turista agod nga may gastuson para sa waste management at iba pang environmental issues sa isla.
Paga-gamiton ro nasambitan nga pondo para sa improvement it Boracay sanitary landfill nga makita sa mainland Malay.
Maghalin sa P75 pesos nga environmental fee, paga-ubrahon raya nga P100 hasta P150 pesos.
Balak man makaron it gobyerno lokal nga mag-ubra it bag-ong ordinansa patukoy sa garbage fee nga direktang magasukot sa mga establisyemento nga igabase sa kaabuon it basura o per kilo.
Sa makaraya nga pamaagi, ro mga recyclables it mga resorts hay indi eon pag ieakot sa mga pagahakuton nga basura ag pwede nanda raya nga pagkakitaan.
Nag-ugat ro isyu it pagpataas it environmental fee matapos mag-abot sa P36.8 Million ro baeayran it LGU Malay sa garbage contractor nga ECOS para sa buean it Enero ag Pebrero makaron nga dag-on.
