KALIBO, Aklan — Gusto ni Pangueong Rodrigo Duterte nga ipatuman man sa iba pang tourist destinations sa nasyon ro environment compliance nga ginapatuman makaron sa isla it Boracay.
Suno kay Department of Interior and Local Government (DILG) Secretary Eduardo Año nga maabong pagbag-o ro ginhimo sa Boracay kaeakip eon ro clearing operations ukon pagguba sa mga sab-eag sa pagpaeapad it karsada kamana man sa 25+5 meter easement sa beachfront.
Obligado man ro tanan nga gustong mag-negosyo sa isla nga magsikyar it environmental compliance certificate (ECC) halin sa Department of Environment and Natural Resources (DENR).
Gin-insister pa kara nga ro pagkasamad it palibot sa Boracay hay sangka halimbawa it over-development kabangdanan nga ro tourist destination hay ginbansagang cesspool.
Uman nga magabukas ro isla sa mga turista sa masunod nga dominggo kasunod it an-om nga bueang pagpasarado matapos bansagan ni Duterte nga cesspool.
