KALIBO, Aklan – – – Ginagamit eamang ro environmental issue agud malimpiyuhan ro isla it Boracay agud mapatindugan it casino.
Raya ro gin pamilit ni Lea Alonzo, Senior Researcher it Center of Environmental Concerns sa gin patigayung pagpueong nga gin tambongan it mga pribadong sektor ag stakeholders nga naga kondina sa closure order.
Suno kana nga ginagamit eamang ro nasambitang issue agud malimpiyuhan ro Boracay kun siin pati ro mga tawo hay naga limpiyu eonman apang, ro nasayuran man it kaabuan hay para raya sa iga patukod nga casino sa isla.
Gin pahayag dugang pa ni Alonzo nga owa sanda it nakitang plano para sa nasambitang rehabilitasyon.
Suno kana nga kinahangean it time frame agud matunga ro mga paga himuon sa sueod it an-um nga buean ag dapat nga klaro ro nakaplastar nga mga ‘parameters’ para dikara.
Sa pihak nga parte, ro dahilan eamang sigon kun ham-an gina pa-demolish ro mga kabaeayan sa isla hay bangud sa nakatukod raya sa wetlands.
Apang, gin pahayag ni Alonzo nga dag-un 1945 pa naga estar ro mga residente dikara ag nagabayad it tax declaration.
Naga kahueogan sigon raya nga mabuhay eon rayang gina pabay-an nga matabo ag sa makaron hay gina pahalin eon lang ro mga naga estar sa lugar nga owa it due process mag eowas eon lang sa Notice to Vacate nga gina tao kanda.
Samtang, indi pa masayuran sa makaron kun siin iga relocate ro mga residenting maapektuhan.
