KALIBO, Aklan—Nabatyagan eon man it mga vendors sa Kalibo Public Market ro gulpyadang pagtaas it presyuhanay it produktong petrolyo sa nasyon.
Raya hay kasunod gihapon it nagapadayon nga kinagamo sa tunga it Russia ag Ukraine kon siin ro Pilipinas hay sambilog sa mga importing countries it langis.
Suno sa pila ka mga vendors, posibleng magapataas man sanda it presyo sa andang mga baligya bangud nga mag-eowas sa ginabyahe nanda raya hay mahae pa ro pasa man kanda it andang mga supplier.
Agud nga makabawi maskin sa kapital eamang hay magapataas man sigon sanda it pilang pesos sa tanan nga klase it produkto.
Sa makaron sigon hay nagapabilin nga maeanghay ro andang negosyo sa pihak nga ginpaidaeom eon sa alert level 1 status ro bilog nga probinsya it Aklan.
Raya hay kasunod man it pag-arangkada it uman it mga talipapa sa kabaryuhan kon siin inde eon maisipan it mga konsumidor nga magpanindahan pa sa public market bangud nga mismong sa andang baryo hay kumpleto nga mabakae ro mga kinahang-eanon sa pang adlaw-adlaw.
