Ginkumpirma it pamunuan it Energy Regulatory Commission nga ginatun-an eon nanda kon pwedeng magpatuman it moratorium sa disconnection ag panueoktan it kuryente para sa mga lugar nga una sa State of Calamity bangud sa bagyong Kristine.
Raya hay bilang pagsunod sa direktiba ni Pangueong Ferdinand Marcos Jr. sa ahensya nga taw-an it kasoehayan ro mga residente nga naapektuhan it kalamidad.
Suno sa ERC, pagatun-an it andang ahensya kon pwedeng amat-amaton it mga konsumer ro andang bill sa kuryente para inde sanda malisdan samtang nagabangon sa epekto it bagyo.
Angot kara hay gin-engganyo it ahensya ro tanan nga mga Distribution Utilities nga magpatigayon it pag-istudyo kon paano sanda makabulig sa mga electricity bills it andang mga konsumer.
Gin-engganyo man it ERC ro National Grid Corporation of the Philippines ag Electric Cooperatives nga dasigan ro pagsaayos it mga linya nga nasamad it bagyong Kristine.
