Matapos ro haeos daywang dag-on nga pag-untat it byahe, uman nga naghugpa sa Kalibo International Airport ro eroplanong T’Way Air daea ro pasahero nga nagaabot sa 132 maghalin sa Incheon, Korea.
Raya ro pangaywang international airline operator nga nagbalik it andang operasyon sa nasambit nga paeoparan.
Ro nasambit nga eroplanong may ruta nga Incheon to Kalibo hay magabyahe it daywang beses sa sueod it sang dominggo hasta sa Hunyo 30.
Apang, nagaproponer ro mga raya it adlaw-adlaw nga flight umpisa sa Hulyo 1 it presenteng dag-on.
Nauna eon nga ginsug-aeaw it Ati-atihan tribe ro mga pasahero kamana man gintaw-an it ceremonial water cannon salute ro nasambit nga eroplano sa PTB international arrival area.
Nasayuran nga ro pagbalik it mga international flight sa Kalibo airport hay kaparte man it pagpaninguha it Civil Avaition Authority of the Philippines ukon CAAP ag gobyerno probinsya it Aklan bangud sa mas ginpahaeoga nga restriction kamana man para amat-amat nga maibalik ro kapagsik it industriya it turismo sa probinsya.
