KALIBO, AKLAN — Nagtuga it panic ag kahadlok sa mga ginikanan ag estudyante it Manocmanoc Elementary School sa isla it Boracay kat mag-eapta ro balita nga may bomba sa sueod it eskwelahan.
Suno kay SPO2 Christopher Mendoza, police community relations officer it Boracay Tourist Assistance Center (BTAC), bandang alas-8:52 it agahon kat gintawag sa Joint Task Force Boracay ro bomb threat nga insigidang ginrespondehan it andang bomb squad ag iba pang pulis.
Sangka misis nga ginaturong ginhalinan it balita ro gindakop ag gindaea sa police station kaibahan ro mag-asawa ag puro mga residente it nasambitang lugar.
Ginpamalibaran it misis ro akusasyon ag ginpahayag nga nagkutana eamang imaw sa anang kaeapit-baeay kon minatuod nga may bomb threat sa Boracay nga iba man ro pagkabati it karelasyon butang nga insigidang nag-adto sa eskwelahan ag ginpamalitang may bomba sa sueod kara.
Pilang mga ginikanan ro nagpadueong sa eskwelahan ag temprano nga ginsueang ro andang mga onga kabangdanan nga ginkansela ro klase.
Pati eon ro kaeapit nga mga private school hay nagkansela it klase bangud sa insidente.
Sa pihak nga parte, negatibo sa bomba ro eskwelahan ag tsismis eamang sigon ro natabo nga madasig nga nag-eapta.
Uman nga nagpaandam ro Boracay PNP sa publiko nga inde maghinangae it kaangot sa mga bomba ukon pasabog bangud mag-eowas sa pagaatubangong kaso hay mahimo raya magtuga it kinagamo kapin eon sa mga matawong lugar.
