An-um nga estudyante sa sangka high school sa Texas ro naospital bangud sa sangka prank gamit ro produkto nga ginatawag nga “fart spray”!
Suno sa Caney Creek Fire and Rescue, nag-umpisa nga mahumgan it bilog nga campus it Caney Creek High School ro mabahong hugum ko agahon it May 3.
Sa una hay gin-eaum it mga nagadumaea it eskwelahan nga may una nga gas leak rason nga ginpa-evacuate ro mga estudyante sa school grounds ag nagtawag sa fire department.
Kat owa it nakitang problema ro gas detection equipment it mga bumbero, insigidang nag-resume ro classes maskin nga nahumgan pa sa bilog nga eskwelahan ro mabahong hugum.
Samtang sa katung-anan it mga klase, 14 nga estudyante ro nakabatyag it grabeng pagsakit it ueo ag an-um sa mga raya ro ginkinahangean nga daehon sa ospital.
Bangud kara, nagdesisyon ro eskwelahan nga suspendihon ro klase it sang domingo maskin nga nakakolekta eon it air samples ro Hazardous Materials Response Teams ag nakumpirma nanda nga eowas ro air quality sa sueod it eskwelahan.
Pag abot it Mayo 5, sangka estudyante ro nag aku nga imaw ro may kahimuan it mabahong hugum.
Suno kana, naggamit imaw it “Hensgaukt Fart Spray”, sangka spray nga nababakae online para gamiton nga pang prank ukon practical joke.
Sa makaron, eowas eon ro mga estudyanteng gindaea sa ospital.
Nagbalik eon sa normal ro mga klase ag gina-imbestigahan pa kun sin-o ro mga kakuncha it estudyante sa ginp-obra kara nga peligrosong prank.
