KALIBO, Aklan—Puro mga essential travelers eamang hasta sa makarun ro ginapasugtan nga makasueod sa probinsya it Aklan maghalin sa NCR plus sa pihak nga ginpaidaeum eun raya sa General Community Quarantine (GCQ) with hightened restriction.
Raya ro pagklaro ni Provincial Administrator Atty. Selwyn Ibarreta sa tunga it halo-halo nga reaksyon ag nagabaha nga reklamo it mga Aklanon nga maga-uli kunta sa probinsya.
Nasayuran nga maabo ro nakabatyag it kasubo matapos nga makansela eamang ro andang pag-uli sa probinsya matapos makaangkon it problema sa website.
Apang suno kay Atty. Ibarreta nga systems generated ro QR code kon sa siin automatic nga gina-deny kara ro mga naga-uli maghalin sa NCR plus.
May kaangtanan kara, anang gineaygayan ro publiko nga indi anay magpaidaeum sa swab test ukon magbook it ticket online sa mga airline companies hasta nga owa it kompleto nga impormasyon maghalin sa lugar nga paga-adtunan.
Samtang, uman man raya nga nagpadumdom sa publiko nga maskin una sa idaeum it MGCQ ro probinsya hay padayun nga magsunod sa ginapatuman nga minimum health protocol mas kapin gid ro paglikaw anay sa mass gatherings nga imaw ro kaabuan sa mga naging rason it pagtinaas it mga kaso it deadly virus.
