KALIBO, Aklan—Aminado ro mga establishment owner sa isla it Boracay nga amat-amat eon nanda nga nabatyagan ro epekto it 2019 novel coronavirus (nCoV) scare.
Suno kay Boyet Sacdalan, vice chairman it Compliant Association of Boracay nga naging mabudlay ro pagbangon it sector it turismo sa isla bangud sa sunod-sunod nga insidente.
Owa pa sigon sanda nakabangon sa epekto it pagpanaeasa it bagyong Ursula hay ginsundan raya it pag-eupok it bulkang Taal, kun sa siin, nakaangkon it pilang suspension it flights.
Mag-eowas kara, mas pang nabawasan ro numero it mga turistang Chinese nga nagabakasyon sa Boracay kasunod it ginpatuman nga travel restriction it gobyerno it China sa sueod it andang nasyon bangud sa makamaeatay nga respiratory virus.
Natiempo pa sigon raya sa selebrasyon it Chinese new year.
Gindugang pa ni Sacdalan nga kaeabanan nga apektado makaron hay ro mga Chinese restaurants.
Apang, punuan pa ro mga hotels ag resorts.
Maskin sigon nga ginsuspinde ro charter flights sa Wuhan, China hay may una pa nga mga individual travelers halin sa China.
