KALIBO, Aklan—Makabig sigon nga nagapangunang battleground makaron sa eleksyon sa US ro estado it Arizona.
Suno kay Bombo International Correspondent Noel Dela Cruz it Brgy. Andagao, Kalibo ag dating anchorman it Bombo Radyo ag presenteng naga-istar sa Phoenix, Arizona nga raya ro nagapangunang rason kon ham-an nga nagabinalik-balik sa Arizona si President Donald Trump.
Liyamado sigon sa andang lugar si Democratic challenger Joe Biden rason nga mas pang ginpabaskog ni Trump ro anang kampanya agud nga mabo-oe ro 11 nga electors nga naga-representar kanda nga mga pumueuyu sa Electoral College pinaagi sa popular vote para sa ginahandum nga 270 votes nga kinahangean agud nga makabalik imaw sa white house.
Gindugang pa ni Dela cruz nga kaeabanan sa mga taga Arizona hay nagboto pinaagi sa mail ag ro resulta it boeutohan hay masayuran sa Nobyembre 3.
Nagapanguna sigon si Biden sa nagkaeain-eain nga mga surveys ,kun sa siin pila sa mga isyu nga ginatutukan it mga botante hay ro angot sa ekonomiya ag coronavirus pandemic.
Raya hay sa pihak it mga nagakalhit nga black propaganda kontra kay Biden.
Sa kamatuoran suno kana si Trump ro may sekretong bank account sa china ag may utang nga kapin sa 1-bilyon dollars rason nga owa sigon nana ginapaguwa hasta makaron ro anang tax returns nga sangka requirements sa mga nagakandidato.
Mas mataas man sigon ro numero it mga nagboto makaron kumpara ko 2016 eakip ro mga minority kapareho it mga pinoy ag mga latino.
Maskin sigon ro mga republicans sa Arizona nga kaalyado ni trump hay nagapabor kay Biden.
