KALIBO, Aklan—Nagapangatubang sa kasong pag-eabag sa Republic Act 9165 ukon Comprehensive Dangerous Drugs Act of 2002 ro sangka estudyante matapos nga maaresto sa drug buy-bust operation it pulisya sa Oyotorong Street, Brgy. Poblacion, Kalibo.
Ginkilaea ni Police Major Frensy Andrade it Provincial Drug Enforcement Unit (PDEU)-Aklan ro suspek nga si Jerrenz Dizon Abuel, 18-anyos ag residente it Brgy. Nalook, Kalibo.
Narekober sa posisyon ag kontrol it suspek ro sangka sachet it dried marijuana leaves kabaylo it marked money nga P1,000.
Suno kay Police Major Andrade, nag-umpisa ro andang monitoring sa suspek ko October 2019 matapos nga may nag-imporma kanda nga sangka ginikanan nga ginatanyagan it suspek it illegal nga droga ro anang onga.
Ginpahayag dugang nga bukon eamang it sa andang eskwelahan nagabaligya ro suspek kundi parokyano man kara ro mga estudyante it iba pang eskwelahan.
Samtang sa pihak nga parte, uman nga ginpadumdom ni P/Major Andrade ro mga ginikanan nga pasilabtan ro private message it andang mga onga agud nga masiguro nga uwa ro mga raya naga-intra sa illegal nga droga.
Ginlaygayan man nana ro mga pamatan-on nga kilatison it husto ro andang mga amigo ag kon may eain sandang mataeopangdan hay gilayon nga magreport sa pulisya ukon isugid sa andang mga ginikanan.
