KALIBO, Aklan — Nagapadayun ro imbestigahan it Kalibo Police Station sa gina-alegar nga paghold-up sa sangka estudyante sa sangka bus terminal sa Brgy. Estancia, Kalibo, Aklan.
Nakilaea ro biktima nga si Joshel Andrade, 21, sangka estudyante ag may part time job nga nagabaligya it mga libro ag residente it Valderrama, Antique.
Base sa panaysayon it biktima, halin imaw sa Valderrama ag maga-agto sa Kalibo para kunta nga maga remit it koleksyon it binaligyaan it libro.
Kat nagabantay eon it tricycle sangka owa nakilaea sigon nga eaeaki ro nagpaeapit kana ag gintutukan imaw it sangka matig-a nga bagay kadungan ro pagdeklara it hold-up.
Bangud sa kahadlok, owa imaw it nahimo kundi nga itau ro wallet nga may sueod nga masobra sa P41,000.00.
Pagkatapos hay madasig sigon nga nagpaeagiw ro suspek nga may suksok nga face mask ag jacket sakay it puting tricycle paadto sa direksyon it Poblacion Kalibo.
Naga hinyo man ro biktima sa mga otoridad nga rebyuhon ro CCTV footage it posibleng gin-agihan it suspek agud nga matumod ro anang identity.
