KALIBO, AKLAN — Maskin nga halin sa sangka broken family, owa raya naging sab-eag agud nga magtapos nga Magna Cum Laude ni Casey Louise Autencio it banwa it Lezo sa Aklan Catholic College.
Sa kamatuoran hay naging motibasyon pa sigon nana raya sa anang pagtuon.
Bata pa eamang sigon hay nagbueag eon ro anang mga ginikanan ag sa mayad nga swerte hay naka-asawa it uman ro anang ama nga kon sa siin ro anang step-mother nga nagatrabaho bilang OFW sa Dubai ro nagagastos sa anang pagtuon sa kolehiyo.
Ro naging strategy sigon nana sa anang pagtuon hay ro pagpahaum kon may paea-abuton nga quiz, project ag exam.
Naging consistent academic awardee sigon imaw umpisa 1st year hasta 3rd year rason nga expected nana ro honor nga mabaton sa anang pagtapos sa kursong Bachelor of Secondary Education major in Biological Science.
Maskin sigon nga may nga nagapangasawa hay owa gid imaw nagpa-tintar nga makipag-nobyo kadungan sa anang pagtuon.
Mag-eowas kara, nakaangkon man imaw it problema sa anang ikamayad nga eawas matapos nga madiagnose nga may vertigo, sangka motion sickness rason nga indi masyadong makapueaw it mayad.
Samtang, ginpahayag man it anang kaklase nga si Crissa Mae it Pandan Antique nga magatapos nga Cum Laude sa kaparehong kurso ag major nga eubus ro kalipay nga anang nabatyagan nga makatapos nga may honor sa pihak it kakueangan sa pinansiyal. Hardwork, perseverance ag disiplina ro yabe sa anang kadaeag-an.
