KALIBO, Aklan — Patay eon kat maka-abot sa health center ro sangka estudyante matapos nga maeumos sa andang outing bandang alas-3:30 kaina it aga-aga sa baybayon nga sakop it Brgy. Bel-is, Buruanga.
Kaibahan it biktimang si John Policarp Betita it Barangay Caticlan , Malay ro daywa kara nga kaklase nga sanday Rey Victor Buncaras, 20, residente it Brgy. Aras-asan, Sebaste, Antique ag Joseph Magsipoc, 20, residente it Brgy. Panagatan, Caluya, Antique ag temporaryo nga naga istar sa Brgy. Tigum, Buruanga nga nag-agto sa Hinugtan Resort sa nasambit nga lugar .
Suno kay Police Captain Wilfredo Venus Jr., hepe it Buruanga Police Station, insigidang nagpangayo it bulig ro daywa nana nga kaklase matapos nga makita ro biktima nga nagahapa sa bibi it baybay .
Bandang alas-8:00 sigon kabi-i hay nag-inuman anay sanda antes nga nagdesisyon nga magpaligos sa dagat.
Bandang alas-11:00 kabi-i hay nagbalik sanda sa cottage agud nga magpahuway apang bandang alas-3:00 it aga-aga hay nataeupangdan nanda nga owa eon sa eugban si Betita.
Gin-usoy nanda raya ag nakita sa kilid it baybay nga owa eon it alintro.
Insigidang gindaea nanda raya sa Buruanga Municipal health office apang gindeklarang dead on arrival it doctor nga nagtan-aw kana.
Ginapatihan nga uman nga nagbalik sa dagat ro biktima agud nga magpaligos, apang sa owa it swerte hay naeumos.
Nakataeanang igapaidaeum sa autopsy ro bangkay it biktima agud nga masayuran kon may foul play sa insidente.
