KALIBO, Aklan—Nakilaea eon ro bangkay it eaeaking nag-eumpat sa Kalibo-Numancia bridge bandang ala-1:00 kahapon it aga-aga sa Brgy. Bulwang, Numancia.
Ro biktima hay sangka 20 anyos ag residente it Brgy. Bacan, Banga.
Imaw hay estudyante it Aklan State University Kalibo campus sa kursong civil engineering.
Positibo nga ginkilaea it anang pamilya nga ro bangkay nga gindaea sa sangka funeral homes sa banwa it Numancia hay ro miyembro it andang pamilya nga andang gina usoy may pilang adlaw eon ro nagtaliwan.
Nagpamalibad eon nga magtau it dugang nga komento ro pamilya sa naging kamatayon it biktima.
Agud nga maduea ro pagduda, ginpaidaeum sa post mortem examination ro eawas it biktima ag base sa resulta, owa raya nakitaan it foul play ag pagkaeumos ro pinakarason it anang pagkamatay.
Madumduman nga antes nga nag eumpat sa tulay hay nakita raya it pilang mga kaeaeakin-an nga naga inuman sa lugar nga makapilang beses imaw nga nagpabalik-balik sa tulay.
Gintinguhaan pa raya nga i-CPR it mga nag-rescue kana, apang owa eon nasarangan ag kat gindaea sa aklan provincial hospital hay gindeklarang dead on arrival.
Sa CCTV footage nga nabo-oe it Numancia PNP, ap-at nga beses raya nga nagbalik-balik sa tulay antes nga eubusan nga nag eumpat.
