KALIBO, Aklan—Eubos nga ginareklamo it mga pasahero ro owa sa gihapon pagnaba it pamasahe it pilang ka jeepney nga nagabiyahe sa easternside it probinsya it Aklan.
Suno kay Thelma Nalumen, presidente it senior citizen sa Barangay Pang-itan, Madalag nga nagaeaum sandang mabuhinan man ro andang ginabayaran nga pamasahe kat ginpasugtan eun nga magkarga it hasta sa 70 porsiyento it andang kapasidad ro mga saeakyan.
Apang napas-eawan eamang sanda bangud hasta makarun hay pareho eamang ro andang pamasahe ko dati kay umpisa nga nag-eupok ro pandemya.
Nasayuran nga si nanay Thelma hay nagsakay sa jeep nga nagabiyaheng Libacao-Kalibo.
Nagsakay imaw maghalin sa daguitan paadto it kalibo ag ginsukot it kapin sa 70 pesos nga pamasahe.
Haeos katunga man raya it anang dating ginapamasahe kat owa pa it pandemya nga kapin sa 35 pesos.
