KALIBO, Aklan—Eubusan eon nga naresolba ro bagina sa manaba nga kapueungan it kongreso.
Suno kay Aklan 1st district congressman Carlito Marquez nga gusto eamang it mayoriya it mga kongresista nga mapatuman ro term sharing agreement sa speakership post sa tunga ni Taguig-Pateros Representative Alan Peter Cayetano ag Marinduque Rep Lord Allan Velasco.
Ko adlaw it Martes suno kana hay pormal eon nga nagpungko bilang Speaker si Velasco samtang si dating Speaker Cayetano hay nag resign eon sa pwesto.
Nagaeaum si Marquez nga bangud kara hay owa eon it magiging sabeag sa pagpasa sa 2021 proposed national budget.
Gindugang pa ni Cong. Marquez nga nagkasugot sigon ro mga miyembro it Nationalist People’s Coalition nga suportahan ro bag-ong Speaker rason nga nagtambong sanda sa pagtipon-tipon it mga kaalyado ni Velasco sa sangka special meeting sa Celebrity Sports Plaza sa Quezon City ko Lunes nga adlaw.
Owa sigon it problema kay Cayetano apang dapat nga respetuhon ro boses ag kagustuhan it mayorya.
Gindugang pa ni Marquez nga ro problema eamang hay owa nakaangkon it smooth ukon maayos nga transition ukon pormal nga pagturn-over it anang pwesto, kun sa siin hay pwersahan pa ro andang pagsueod sa plenaryo it Kamara bangud nga naka-lock ro mga pwertahan.
Napa-temprano suno kana ro pagpungko sa pwesto ni Velasco imbes nga oktubre 14 matapos nga ginsuspinde ni Cayetano ro sesyon it plenaryo hasta Nobyembre 16.
Ginpamilit pa kara nga ro requirement nga dapat nga makaangkon it majority nga boto hay nabo-oe man ni Velasco.
Nasayuran nga ro kampo ni Velasco hay may una nga 186 nga numero samtang ro kampo ni Cayetano hay may una nga 184 supporters sa Kamara.
Ko adlaw it martes hay pormal eon nga nagpungko bilang Speaker si Marinduque Rep. Lord Allan Velasco samtang si dating Speaker Alan Peter Cayetano hay nag resign eon sa pwesto.
