KALIBO, Aklan —- Balik kulungan ro sangka ex-detainee matapos nga bun-on patay ro 21-anyos nga kaeapitbaeay bandang alas-11:30 kabi-i sa Sitio San Roque, Purok 6, Barangay Tigayon, Kalibo.
Nakilaea ro biktima nga si Christian Tuban, owa it asawa samtang arestado ro suspek nga si Hazel Diangson, parehong residente it nasambit nga lugar.
Base sa report, matapos makabati it pagsinangag ro biktima hay nagguwa raya sa andang baeay at nakaangkon sanda it diskusyon it suspek nga armado it siyaw.
Sa owa it anuman nga rason, gulping ginbuno it suspek ro biktima nga tinamaan sa waea nga porsyon it anang dughan.
Nahimo pa nga makadaeagan ni Tuban sa anang ina ag nakasugid kon sin-o ro nagbuno kana.
Hadaea pa sa Panay Health Care Hospital ro biktima apang patay eon kat maka-abot.
Bandang alas-7:00, agahon it Martes, naaresto si Diangson sa andang baeay matapos nga magpaeagiw kabi-i kat mahimo ro krimen.
Ginasugid nga bag-ong hilway eamang ro suspek ag sakit it ueo it andang barangay.
Presente raya nga nakakulong sa Kalibo Municipal Police Station ag nakataeana nga pasakaan it kasong homicide.
