KALIBO, Aklan—Nagapati si dating provincial board member ag political analyst sa Aklan nga si Atty. Harry Sucgang nga indi makasuhan si former President Rodrigo Duterte bangud sa anang mandu sa mga opisyal it kapulisan nga engganyuhon ro mga kriminal nga magsukoe agud nga makaangkon it rason agud nga sanda hay patyon.
Raya hay kasunod it pag-atubang kahapon it dating presidente sa imbestigasyon it Senate blue ribbon committee sa pagpatuman it kampanya kontra sa iligal nga droga it anang administrasyon.
Ginpahayag ni Atty. Sucgang nga nagaguwa nga “self defense” eamang ro anang ginapa-obra sa mga kapulisan nga makabig nga sangka lawful order rason nga bukon it eabag sa laye.
Nauna eon nga ginpanindugan ni Duterte nga owa nana ginmandu ro pagpatay sa pagpatuman it war on drugs.
Dugang pa nga owa sigon nana ginapasugtan ro mga pulis ag soldado nga abusuhon ro andang awtoridad ag gahum.
