NATIONAL News—Gina-ayos eon it Office of the President (OP) ro sangka Executive Order (EO) para sa ginbilog nga task force ni Pangueong Rodrigo Duterte para sa madasig nga rehabilitasyon sa mga naapektuhan it kalamidad.
Ginpahayag ni Presidential Spokesman Harry Roque, pagatawgon raya bilang “Build Back Better Task Force” nga pagapangunahan ni Executive Secretary Salvador Medialdea.
Suno kay Sec. Roque, ro pagbilog ni Pangueong Duterte it task force hay tuyo nga makaangkon it mas permanenteng body nga magatutok ag mag-develop it expertise sa post disaster rehabilitation and recovery sa mga lugar nga grabeng tinamaan it kalamidad, antes maipasa ro proposisyong laye nga magahimo it Department of Disaster Resilience (DDR).
Kaibahan sa mga miembro it build better task force ro Department of Agriculture (DA), Department of Public Works and Highways (DPWH), Department of Budget of Management (DBM), Department of Social Welfare and Development (DSWD), National Irrigation Authority (NIA), NEA, National Housing Authority (NHA) ag iba pa.
Ginmanduan man ro Philippine Air Force (PAF), Philippine Navy (PN) ag Philippine Coast Guard (PCG) nga magtao it bulig sa task force.
Gina-engganyo man ro mga concerned local government units (LGUs) nga magbulig sa pagpabalik ag transformation it mga peligrosong mga lugar paadto sa sangka mas resilient, integrated ag sustainable communities.
