KALIBO, Aklan—Nagguwa eon ro panibag-ong sueondanan sa mas strikto ag hugot pa gid nga implementasyon it health and safety protocol agud nga malikawan ro sigidas nga pag-eapta it covid-19 sa bilog nga probinsya it Aklan.
Sandig sa Executive Order 005-C series of 2021 ni Aklan Governor Florencio Miraflores, ro pwede eamang makaguwa sa andang tagsa ka panimaeay hay ro naga-edad it 16 hasta 65 anyos apang limitado eamang sa may mga importante nga panaw.
Ginalimitahan man ro pagguwa ukon pagpinanaw it mga nabdos nga babaye ukon mga indibidwal nga may sakit mag-eowas eon lang kon sanda hay magapa check-up, magapabueong ukon may essential nga ginabakae.
Ginabawaean man ro pagbukas it mga bars, clubs, kids amusement, peryas ag concert halls.
Samtang ro mga mahilig nga mag rides gamit ro bike, sa anda eamang nga natungdan nga banwa sanda pwede makalibot apang ro mga may trabaho nga bike ro source of transportation, ginapasugtan raya sandig sa sueondanan nga ginpaguwa it gobernador.
Sa pihak nga parte, may nakaplastar eon nga inter town ag barangay control border kon sa siin ginarequired ro travel pass ukon company ID, certificate of employement sa may mga trabaho ag essential travel.
Nagapabilin man ro curfew nga naga-umpisa sa alas-9:00 it gabie hasta alas-5:00 it aga-aga.
Hugot man nga ginabawae ro pagbakae ukon pagtransport it ilimnon nga makahieilong kamana man hugot nga ginabawae ro social ag non essential gatherings.
Una kara, nagpatigayon it meeting ro Aklan Provincial Inter-Agency Task Force for Covid-19 nga ginpangunahan ni Governor Miraflores.
Ginkasugtanan sa nasambit nga hinun-anon it mga municipal mayors, municipal health officers ag iba pang ahensya it gobyerno nga pabaskugon ag hugton pa gid ro implementasyon it community quarantine kon sa siin ro Aklan hay nagapabilin sa Modified General Community Quarantine ukon MGCQ.
Sa makaron hay ginakabig nga high risk municipalities ro Altavas, Balete, Ibajay, Lezo, Kalibo ag Malay samtang una sa moderate risks ro banwa it Malinao, New Washington ag Numancia.
