KALIBO, Aklan—Extended hasta sa katapusan it dag-on ro validity it mga nag-expired eun nga lisensya it mga driver ag konduktor kamana man ro mga student permit it mga una sa edad 17 hasta 21 ag 60 hasta 65 nga owa ginpasugtan nga makaguwa sa andang panimaey bangud sa paeag it COVID-19.
Suno kay Riza Otayde, tagapaghambae it Land Transportation Office ukon LTO Region 6 nga makarun hay nagpaguwa eun it memorandum ro central office it LTO angot sa nasambitan nga butang.
Raya hay bilang sabat man sa panawagan it publiko nga naapektuhan it pandemya ag ginapatuman nga mga community quarantine.
Ginapahayag dugang nga owa it multa sa mga late renewal it driver’s ag conductor’s license nga nakaibahan sa nasambitan nga age group.
Samtang, ginpaeawig man hasta sa October 31 ro deadline sa pagparehistro it mga motorsiklong may plakang nagatapos sa 6,7 ag 8 it mga kaeakip sa kaparehong age group.
Samtang hasta sa December 31 man para sa mga may plakang nagatapos sa 9 ag 0.
