Kasunod it pagsueod sa ‘new normal’, nagaeaum ro Department of Education (DepEd) nga makapatigayon ro mga eskwelahan it limited physical End-of-School-Year para sa school year 2021-2022.
Maskin nga depende sigon raya sa risk assessment it mga rehiyon kun makasarang nga makapatigayon it graduation rites ro mga eskuwelahan.
Kabay nga indi eon matabu ro ginakabaeak-an nga uman nga pagtaas it kaso it COVID-19 bangud sa pag-eabag sa protocols, pagdagsa sa mga campaign rallies ag ro ginasugid nga pagtahaw it immunity tuga it COVID vaccine.
Kasunod man it ginaeauman nga physical graduation rites, gin-umpisahan eon man ro pagplano ag pagbilog it mga sueundanan para sa Curriculum and Instruction kun paalin ro pagpatigayon it aktibidad.
Kapareho it ibang hilimuon, maskin sa graduation hay ipabilin nga nagakabagay ro mga sueundanan nga pang-ikamayad nga eawas ag mga protocol sa kaeowasan sa pagpatigayon it bilog nga seremonya.
Manami nga isipon nga matapos ro maabu nga pagbag-o ag kabudlay sa pagtuon, nasarangan gihapon nga maeampasan ro edukasyon sa tunga it pandemya.
Dapat nga pasaeamatan ro mga opisyak it eskwelahan, mga manugturo , pati eon ro mga ginikanan nga matiyaga nga nag-giya sa mga unga samtang naga-tuon sa baeay.
Nagaeaum kita nga mas mabakod eon ro edukasyon bangud nga nasarangan naton raya sa mabudlay nga sitwasyon.
