KALIBO, Aklan— Na-hacked ro facebook account it Balete Municipal Police Station rason nga inde eon makalog-in ro mga pulis halin pa ko Enero 2, 2019.
Raya ro ginklaro ni SPO2 Ismael Panganonong it Balete PNP sa interview it Bombo Radyo Kalibo.
Ginpaathag ni Panganonong nga nakibot eamang sigon sanda kat maabo ro nagtawag ag nagpaabot it impormasyon sa andang taeatapan nga malaswang litrato it babaye ro nakabutang sa andang profile picture.
Uwa suno kana sanda it intensyon nga pataeangon ro publiko matapos ro nag-eontad nga insidente.
Pila eamang sa andang myembro ro nakasayod it password sa andang social media account rason nga inde pa nanda sa makaron matumod kon sin-o ro posibleng may kahimuan sa insidente.
Ginpahayag dugang ni Panganonong nga mayad nga hacker ro nagsueod sa andang account suno man sigon sa sangka I.T expert nga andang ginkonsultahan.
May kaangtanan kara, naghinyo sa publiko si Panganonong nga i-block eon lang sa andang facebook account ro “Balete Pnp Taga Protekta” bangud sa inde eon nanda raya sa makaron ma-access.
Sa makaron suno kana hay nag-obra eon lang sanda it bag-ong account para sa benepisyo ag kasayuran it tanan.
