NATIONAL News — Nagahampang eon lang sa P33 hasta P35 ro presyo kada kilo it imported rice umpisa pa ko Disyembre rason nga dapat eang nga una sa P45 ro presyo kara kada kilo.
Raya ro sabat ni Samahang Industriya ng Agrikultura (SINAG) Executive Director Jayson Cainglet sa nakataeanang pagpatuman it 45 pesos nga Maximum Suggested Retail Price (MSRP) sa bugas umpisa sa Marso 31.
Suno kay Cainglet, dapat nga magnaba ro MSRP agud nga makapanipueos ro consumers bangud nga mag-eowas sa 10 pesos nga patong sa presyo hay nagnaba pa ro taripa rason nga pilang buean eon nga doble ro ginakita it importers.
Ginpahayag pa ni Cainglet nga nagakabaeaka sanda makaron bangud sa pagnaba it farmgate price it paeay nga nagahampang sa P15 hasta P17.
Dugang pa nana nga nalugi eon ro mga mangunguma it kamatis ag sibuyas sa bagsak-presyong daea it imported nga tinuea hay nagapameligro pang malugi man ro mga mangunguma it paeay.
