‘Faulty update’ halin sa CrowdStrike nakaapekto it maabong flights, bangko ag mga negosyo sa bilog nga kalibutan

Naapektuhan ro maabong mga airlines, bangko, negosyo ag pilang mga emergency services matapos natabo nga global outages.

Naghalin ro nasambitan nga problema sa Microsoft services kun siin ginsiguro it kumpanya nga andang ginaayos ro problema.

Suno man sa digital security authority it Germany nga ro global IT outage hay bangud sa ‘faulty update’ halin sa cybersecurity company nga CrowdStrike nga naaapektuhan ro Windows-based computers.

Pahayag ni CrowdStrike CEO George Kurtz nga andang nasayuran eagi ro ginhalinan it problema ag anda raya nga haayos.

Pagklaro man it kompanya nga uwa raya naghalin sa hacking.

Ro nasambitan nga problema hay nagresulta sa maabong mga delayed flights sa bilog nga kalibutan.