KALIBO, Aklan—Padayun ro ginapatigayon nga imbestigasyon it Federal Bureau of Investigation ukon FBI ag kapulisan sa motibo it suspek sa panibag-ong mass shooting incident sa Texas sa Amerika nga ginkamatay it siyam nga katawo.
Apang suno kay Bombo International Correspondent Greg Aguilar it California, USA nga base sa inisyal nga pag-usisa, natumod nga posibleng may sakit sa paminsaron ro suspek ag may kaakig raya sa mga asyano.
Madumduman nga natabu ro insidente sa Allen Premium Outlets, sambilog sa shopping complex sa Allen mga 25 milya ukon 40 kilometros north it Dallas nga ko rato nga tiempo hay puno it weekend shoppers.
Daea it suspek ro AR-15 style weapon ag nagsuksok pa it body armor ag may extra magazines sa chest gear.
Sa pihak nga parte, maeumo sigon nga magpanag-iya ro sin-o man nga residente it armas sa texas bangud nga ginakabig raya nga pro-gun state sa US.
Nasayuran nga base sa record it Gun Violence Archive, may 195 eon nga mass shootings nga natabo sa US makaron nga dag-on.
