Health News ——Gin-aprubahan eon it Food and Drug Administration (FDA) ro aplikasyon para sa clinical trial it COVID-19 vaccine nga himo it kompanyang Sinovac it China.
Bangud kara, ginaeauman eon man ro pag-umpisa it maeapnagong pagtuon sa Pilipinas it Coronavac, ro bakunang himo it Chinese company.
Ko nagtaliwan nga dag-on pa nag-umpisa ro Phase III clinical trials it Sinovac vaccine sa ibang nasyon kaparehas it Brazil ag Turkey.
Makaron nga buean it Enero eamang kat nag-umpisa ro pagtuon sa Indonesia.
Nauna eon nga gin-aprubahan it FDA ro clinical trial application it Janssen Pharmaceutical it Estados Unidos, ag Clover Biopharmaceutical it China.
Owa pa it ginapaguwang interim result ro kompanya para sa mga naunang clinical trial, rason nga uwa pa nagahueag ro proseso it andang aplikasyon para sa emergency use sa Pilipinas.
Paathag it FDA chief, posible pang magtag-od ro 21 diyas nga proseso sa EUA applications, kon aprubado eon it stringent regulatory authorities sa ibang nasyon ro emergency use it sangka bakuna.
Sa makaron, nag-umpisa eon nga maghueag ro EUA application it Gamaleya Institute it Russia matapos makasumite it Phase III results sa ahensya.
Ginabantayan eon man ro pagguwa it desisyon it FDA sa parehong aplikasyon it AstraZeneca.
