KALIBO, Aklan—Ginpasaeamatan it Federation of Numancia Tricycle Operators and Drivers Association (FENUTODA) ro pagdugang it pasahero sa mga nagabiyaheng tricycle sa bilog nga probinsya it Aklan.
Raya hay kasunod it ginpagguwa nga bag-ong advisory ni Governor Florencio Miraflores kung siin nakabaehag kara nga pwede eon magsakay it ap-at nga pasahero ro mga tricycle samtang 70 porsyento man it kapasidad ro pwedeng ma-akomodar it mga multicab, jeep, commuters van ag motorbanca.
Mag-eowas kara, ginpahabaan eon man ro operasyon it mga pampublikong transportasyon umpisa alas-5:00 it aga-aga hasta alas-10 it gabi-i.
Suno kay FENUTODA president Medel Valenzuela, mabahoe raya nga ginhawa sa kapareho nana nga mga driver eabi pa ag sunod-sunod ro naging pagtaas sa presyo it produktong petrolyo.
Sa pihak kara, nagahueat pa sigon sanda it pormal nga anunsyo halin sa andang local chief executive para eubusang ma-implementar ro pagsakay it ap-at nga pasahero sa mga tricycle nga nagabiyahe sa andang banwa.
Dugang pa ni Valenzuela nga base sa andang insiyal nga impormasyon, ginapasugtan eon ro tatlong pasahero halin it Numacia paadto it Kalibo vice versa.
Madumduman nga nauna eon nga gin-anunsyo it Land Transportation Franchising and Regulatory Board (LTFRB) nga indi eon kinahang-ean ro mga plastic barrier sa mga pamublikong saeakyan sa bilog nga Pilipinas.
Ro mga nasambit nga paghaeuga hay base eon man sa padayun nga pagnaba it mga nailistang kaso it COVID-19 sa maabo nga mga rehiyon ukon probinsya sa nasyon.
