KALIBO,
Aklan—Sangka fetus nga gintantyang una sa lima hasta an-om nga
buean nga nakasueod sa karton ag ginputos it plastic ro nadiskubrehan
nga gin-eobong sa Brgy. Pook, Kalibo.
Una kara suno kay “certain Analy”, ginchat imaw it anang barkada kaibahan ro nanay it nasambitang fetus ag nagkutana kon may eogta sa anda nga pwede nga maeobngan it dugo.
May kaangtanan kara, insigida man imaw nga nagpahu-o ag nagpasugot rason nga gindaea ro nasambitang fetus kaibahan ro nanay para ieubong sa nasambitang lugar.
Gin-ibhan pa sigon nana ro daywa sa kaambueongan agud nga idto i-eobong ro ginatumod nga dugo nga uwa man nana pagtan-awa kon dugo gidman ro sueod it nasambitang karton.
Manabaw eamang sigon ro andang ginkutkot nga buho sa pag-eaom nga uwa it makadiskubre kara.
Apang, ginklaro nana nga uwa imaw it kasayuran nga fetus it eapsag ro ginatumod it mga raya nga dugo.
Samtang sa pihak nga parte, nataeopangdan it tag-iya it eogta ro gin-eobong it tatlo ka mga babaye rason nga insigida kara nga gin-usisa si Annaly ag ginpakutkot ro andang gin-eobong nga unang pagkasayod hay dugo bangud nga base makit-an it ayam.
Bangud kara, gilayon nga ginkotkot ro nakaeobong nga karton ag dikara tumambad sa tag-iya it eogta ro fetus it eapsag nga kumpleto eon ro parte it eawas kaibahan ro ana nga inunlan.
May kaangtanan kara, gilayon imaw nga naalarma ag gin-impormahan ro Kalibo PNP agud nga mataw-an it basbas ro fetus ag maipaeobong it maayos.
Ro insidente hay padayon pa nga ginaimbestigahan it pulisya agud nga matumod ro pagkakilan-ean ko Nanay nga presenteng nagatrabaho sa isla it Boracay kaibahan ro anang barkada nga nag-eobong sa nasambitang fetus.
