KALIBO, Aklan — Uman nga nagpanawagan si Fr. Jose Tudd Belandres, Parish Priest it St. John the Baptist Cathedral sa publiko nga indi paggamiton nga kahaeadlukan ro pagdumdum sa Fiesta Minatay.
Suno kay Fr. Tudd nga ro simbahang katolika hay nagaselebrar gid man it holloween, apang raya hay nakasentro sa pagdumdum sa mga santo ag bukon it pagsuksok it mga makahaeadlok nga costume.
Nag-apela man imaw nga obrahon ro tama pinaagi sa pagdumdum ag pagpangamuyo para sa mga mahae sa kabuhi nga nagtaliwan eon.
Sa pihak nga parte, gin-engganyo man nana ro tanan eabi eon ro mga ginikanan nga pasuksukan ro andang mga unga it costume it mga santo ag santa ag magpasakop sa “procession and parade of the saints” it simbahan bandang alas 4:00 it hapon sa Nobyembre 1.
Samtang, may santos nga misa suno kana umpisa alas-5:00 it aga-aga hasta alas 8:00 it agahon, Nob. 1 ag bandang alas 3:00 it hapon hay may misa sa Old ag Medalla Milagrosa Cemetery.
Sa Nobyembre 2 hay may misa man sa sementeryo alas-8:00 it agahon.
