Arestado ro sangka 27 anyos nga Filipino-American nga si Judd Sanson nga konektado sigon sa Jihadist terror group sa New York City, USA.
Nag-atubang ro suspek sa Queens Criminal Court sa New York.
Suno kay Office of Queens District Attorney Melinda Katz, naaresto it police officers si Sanson sa sangka traffic stop ag naaktuhang armado it mapeligrong mga armas sa anang saeakyan nga may obscured nga plaka.
Nataeopangdan man si Sanson nga may saeakyang natakpan ro plaka sa bisinidad it 86th street ag Ditmars sa Queens.
Importante sigon ro nasambit nga mga lokasyon kon sa siin nakit-an ro suspek bangud nga may 2 miyembro ro New York Police District sa public safety ro ginbaril.
Samtang, nagpamalibad ro bogado ni Sanson nga si Thomas Michael Montella sa presensiya it media sa sueod it courtroom bangud nga nagapati raya nga bukon it patas nga maghimo it konklusiyon sa kaso it anang kliyente kon naisapubliko ro hitsura kara bangud nga uwa pa napamatud-an ro mga alegasyon ag uwa pa it naipakitang ebidensiya apang ginpamalibaran it hukom ro pagpamaeabag ni Montella kon sa siin uman imaw nga magaatubang sa korte sa Hulyo 9.
